सांगली, प्रतिनिधी : सांगली जिल्हा पोलीस दलात नागरिकांच्या सुरक्षिततेसह गुन्हेगारीवर प्रभावी नियंत्रण ठेवण्याच्या उद्देशाने मा. विशेष पोलीस महानिरीक्षक, कोल्हापूर परिक्षेत्र यांच्या संकल्पनेतून सांगली शहर व मिरज विभागात बीट पेट्रोलिंग उपक्रमाचा शुभारंभ करण्यात आला आहे. या उपक्रमांतर्गत अद्ययावत मोटारसायकली, वॉकी-टॉकी, ई-पंचिंग मोबाईल, सायरन व फ्लॅश दिव्यांनी सुसज्ज बीट मार्शल पथके सतत आपल्या बीटमध्ये गस्त घालणार आहेत. प्रत्येक मोटारसायकलवर संबंधित पोलीस ठाण्यातील एक पोलीस अंमलदार आणि आर.सी.पी.चा एक पोलीस अंमलदार अशी संयुक्त नियुक्ती करण्यात आली आहे. बीट मार्शल शाळा-महाविद्यालये, गर्दीची ठिकाणे, बाजारपेठा, बँका, ज्वेलरी दुकाने, धार्मिक स्थळे याठिकाणी नियमित भेटी देऊन गुन्हेगारीवर नियंत्रण ठेवणे, कायदा व सुव्यवस्था अबाधित राखणे तसेच नागरिकांमध्ये सुरक्षिततेची भावना निर्माण करण्याचे काम करणार आहेत. या योजनेअंतर्गत सांगली उपविभागात सांगली शहर, विश्रामबाग व संजयनगर परिसरासाठी १० बीट मार्शल जोड्या, तर मिरज उपविभागात मिरज शहर, महात्मा गांधी चौक व एमआयडीसी कुपवाड परिसरासाठी १० बीट मार्शल जोड्या कार्यरत करण्यात आल्या असून, एकूण २० बीट मार्शल जोड्या नागरिकांच्या सेवेसाठी तैनात राहणार आहेत. या उपक्रमाचे उद्घाटन जिल्हा पोलीस अधीक्षक तुषार दोशी यांच्या हस्ते झाले. यावेळी अपर पोलीस अधीक्षक कल्पना बारावकर, उपविभागीय पोलीस अधिकारी संदीप भागवत, पोलीस उपअधीक्षक मुकुंद कुलकर्णी तसेच सांगली शहर व मिरज उपविभागातील सर्व प्रभारी अधिकारी आणि पोलीस अंमलदार उपस्थित होते.