प्रेस नोट. श्रीक्षेत्र खरसुंडी, तालुका आटपाडी, जिल्हा सांगली येथील श्री सिद्धनाथ मंदिरातील मुख्य गाभाऱ्यातील दोन अष्टकोनी खांबावरील चांदीचे नक्षीकाम नुकतेच पूर्ण झाले असून ह्या नूतनीकरणामुळे मंदिराचा गाभारा वैभवशाली दिसू लागला आहे. समस्त भाविक आणि जनतेमधून या उत्कृष्ट कामाबाबत समाधान व्यक्त करण्यात येत आहे.. श्रीनाथ मंदिरातील दोन अष्टकोनी खांबाची चांदी जीर्ण झाल्यामुळे व त्याचा पत्रा उचकटू लागल्याने जानेवारी महिन्यात दुरुस्तीसाठी काढण्यात आली होती. तथापि काही राजकीय हेवेदाव्यातून प्रस्तुत चांदी गहाळ झाल्याची व ट्रस्ट कडून त्याचा अपहार झाल्याच्या चुकीच्या बातम्याही माध्यमातून आल्या होत्या. प्रत्यक्षात हे चांदीचे नक्षीकाम कोल्हापूर येथे दोन ते तीन महिने सुरू होते, ते नुकतेच पूर्ण होऊन हे नक्षीकाम पूर्वीपेक्षा अधिक सुबक, चांगल्या दर्जाचे आणि जास्त वजनासह श्रीनाथ देव देवस्थान ट्रस्टमार्फत पूर्ण करून हे खांब उत्कृष्टरित्या सजवण्यात आले आहेत . खांबाच्या तळाशी चौकोनी चबुतरा, दोन गजमुख. त्याच्यावर उभ्या पट्ट्यांवर सुबक नक्षी व वरती कमानीच्या पट्टीवर भगवान श्री शंकर यांची प्रतिमा, नागफणी,तसेच खरवस देणारी कपिला गाय , आणि नाथ भक्त नयाबाची प्रतिमा, दोन मयूर आणि दोन गजमुख असे सुंदर नक्षीकाम या खांबावर केलेले आहे.मंदिरात दर्शनासाठी येणारे अनेक भाविक या कामाबाबत समाधान व्यक्त करत असून श्रीनाथ मंदिराच्या वैभवात त्यामुळे भर पडली आहे.. चांदीचे हे नक्षीकाम हुपरी येथील श्री महेंद्र कोथळे आणि कोल्हापूर येथील श्री विक्रांत माळी ह्या कारागिरांनी उत्कृष्टरित्या केल्या आहे.