सांगली जिल्ह्यातील आटपाडी तालुक्यातील गावेवाडी येथील गणपती मंदिरात झालेल्या धाडसी चोरीचा गुन्हा आटपाडी पोलिसांनी अवघ्या चार दिवसांत उघडकीस आणला आहे. या कारवाईत पाच आरोपींपैकी चार जणांना अटक करण्यात आली असून, सुमारे १२ लाख ३२ हजार रुपयांचा मुद्देमाल हस्तगत करण्यात पोलिसांना यश आले आहे. एक आरोपी अद्याप फरार असून त्याचा शोध सुरू आहे. व्हॉईस ओव्हर : दिनांक ८ जुलै २०२६ रोजी गावेवाडी येथील गणपती मंदिरात अज्ञात चोरट्यांनी मंदिराच्या छतावरील पत्रे काढून आत प्रवेश केला. त्यानंतर मंदिरातील चांदीचा मकर, उंदीर, तसेच इतर मौल्यवान वस्तू आणि दोन मोटारसायकलींची चोरी करून आरोपी पसार झाले. या घटनेमुळे परिसरात खळबळ उडाली होती. घटनेचे गांभीर्य लक्षात घेऊन सांगली जिल्हा पोलिस अधीक्षक तुषार दोषी यांच्या मार्गदर्शनाखाली विशेष पथकाची स्थापना करण्यात आली. तांत्रिक तपास, सीसीटीव्ही फुटेज, गोपनीय माहिती आणि स्थानिक तपासाच्या आधारे पोलिसांनी अवघ्या चार दिवसांत गुन्ह्याचा छडा लावला. या कारवाईत मारुती गुजले, समाधान उर्फ पप्प्या गुजर, प्रतीक पवार आणि आदित्य मेणकुळे या चार आरोपींना अटक करण्यात आली आहे. तर सतीश साबळे हा आरोपी अद्याप फरार असून त्याचा शोध सुरू आहे. पोलिसांनी आरोपींकडून चांदीचा मकर, चांदीचा उंदीर, पल्सर मोटारसायकल, हिरो मोटारसायकल, होंडा स्प्लेंडर मोटारसायकल असा एकूण सुमारे १२ लाख ३२ हजार रुपयांचा मुद्देमाल जप्त केला आहे. ही कारवाई पोलिस अधीक्षक तुषार दोषी, अपर पोलिस अधीक्षक कल्पना बावरकर, उपविभागीय पोलिस अधिकारी विटा आणि आटपाडी पोलिस स्टेशनचे पोलिस निरीक्षक संतोष पवार यांच्या मार्गदर्शनाखाली तपास पथकाने यशस्वीरीत्या पार पाडली.